اللهم لك الحمد

بسم الله الرحمن الرحيم

معلش يا جماعة حتكلم باختصار

أعتذر لكل اللي علقوا عندي ومردتش عليهم

أنا امبارح

يعني يوم الاتنين

1/12/2008

عملت عملية أسمحولي مش بقدر أعد على الجهاز

ياريت بس تدعولي

عشان بتألم أوي

ويارب كل ~ألم يبقى بيشيل عني ذنوبي

ولما أخف أو أول ما أكون قادر إني أعد على الجهاز حرد على كل الردود اللي مردتش عليها بإذن الله

سلام عليكم

فإن مع العسر يسرا إن مع العسر يسرا

بسم الله الرحمن الرحيم

ياااااااااااااااااااه

الصورة دي كل ما أبصلها بفتكر ايام جميييييييييلة أوووووووي

ساعات لما أشوفها أضحك

ساعات أبكي

ساعات ببكي أوي زي اليومين دول

ساعات بفتكر أيام تحححححححححححفة

ساعات بفتكر نفسي وأنا في المدرسة

بفتكر أولى حضانة

وأستاذة حكمت

ياااااااااه

وصحابي

والألوان المية والألوان الخشب

وأبلة عبير

وأبلة منى

يااااااااااااااه

أيام متتعوضش

الصورة دي بقى كنت مع بابا في الورشة زمااااااان

كنت بروح الورشة زمان

والصنايعية كانوا يحبوني أوووووووي

كنت بقى أمسك مكعب خشب

وأطلع عين اللي جايبينوا مسامير

ههههههههههههههههه

أيام جميلة أوي أوي

مفيش مسئولية

كنت بحس أياميها اني لما أعمل حاجة حلوة ربنا بيكافئني في ساعتها وكنت أحس بحلاوة الحاجة الحلوة

ولما أزعل حد مني أو أشتم كنت أحس ان الناس كلها زعلانة

وساعات أفتكر نفسي لما كنت أعد مع نفسي أدندن وأقول أغاني العيال الصغيرة

وبفتكر الشرايط الكاسيت اللي متسجلالي وأنا صغير

بفتكر وأنا بتعارك مع اخواتي وأد إيه كنت بتغاظ من أقل حاجة

----------------

لحظات قليلة وأفتكر أول واحد حبيته في حياتي

محمد السيد

كنا مع بعض في أولى حضانة

وفي تانية حضانة روحت أول يوم وأول واحد بسأل عليه محمد السيد

صحابي قالولي مشوفناهوش

وسلمتش على صحابي

روحت لأخوه الكبير

قالي محمد مات

كنت صغير

مسدأتش

قولتله بجد فين محمد متهزرش

قالي والله كنا في مطروح في الصيف وغرق

أعدت أعيط

عدت الأيام وصاحبت ناس كتير

وحبيت

حبيت أوي

والفراق عارف طريقه معايا

وللأسف مش مجرد فراق

بيبقى مصاحب لعذاب

لالا مش عذاب

حاجة أكبر مش عارف هي إيه بس هي دايما من نصيبي

لحد دلوقتي لسة بحب كل شخص فارقته

ومحمد السيد وحشني أووووووووي

ححححححححح

تعبت

بس الحياة كدة

الحمد لله

سيبوكوا بقى من النكد ده

وأنا صغير كنت بحب أتكلم مع الكبار أوووووووي

والحمد لله كان في بعضهم بيحكيلي كأني أده

مرة وأنا في ابتدائي

كان واحد ساكن نحيتنا وطبعا صحبي

كان خاطب

فكان لابس سلسلة

قابلته مرة وكلمته على السلسلة بقى والقرآن

ههههههههههههههههه

ونظراته طبعا كانت رهيبة

كمية الذهول طيعا مش طبيعية

وكنت بقى عمال أقوله مينفعش حد يتجوز وهو مش متدين عشان الزواج مسئولية

وكنت بقى أقوله كلام بالغة العربية

وأقوله الصلاة وكدة

ياااااااااااااااااااااه

أنا مش عارف عملت البوست ده ليه

أصلا حاسس ان كلامي مش مرتب

بس بقول اللي بحس بيه

يلا ربنا يهدي بقى

سلام عليكم ورحمة الله وبركاته

مهما لفيت مليش غيرك يارب

بسم الله الرحمن الرحيم

الأول أحب أصبح على كل اللي بينورني

صباح الفل

من كام يوم كدة كنت بفكر في موضوع كدة

بجد موضوع رهيب

الناس فعلا للأسف تيجي في المشاكل لما تغلب تقول خلاص مفيش أدامنا غير كدة

لما حد ييأس في أي حاجة يقول خلاص مفيش أدامي غير كدة

وللأسف الحاجة دي بقت علامو اليأس أو ده اللي كان بيجول في خاطري ساعتها

الحاجة دي أنا بعتبرها سلااااااح بنستخدمه في كل وقت

وقت العمل ووقت اليأس

ده سلاح رهيب مش أي حاجة

السلاح ده هو

الدعاء

مش دعاء هه

الدعااااااااااااااء يا ولاد الذين

الموضوع شغل بالي أوي دخلت وقريت عنه

بجد سبحان الله

احنا المفروض ندعي من كتر احتياجنا لربنا

ده ربنا هو اللي عايزنا ندعيه .. مش كدة بس ده اللي يدعي ياخد ثواب

مش كدة وبس ده ربنا أمرنا ندعيه

بجد سبحان الله

بكل بساطة في شوية حاجات لو عملتها يكون دعائك مسجاب

عارفين يعني ايه ؟؟

دي كارثة

عارف يعني ايه لما تدعي ربنا يستجيب ؟؟

ندخل في المهم عشان موجعش دماغاتكم

أول شرط من الشروط دي

انك تكون بتدعي ربنا ودي مفروغ منها أكيد

يعني متقولش يا هبل هه اااااااخ في ناس لازم تشرحلها بالتفصيل حاجة فظيعة

يا حبايبي قولوا يارب

يا كريم

يا قوي

كدة هه عايزين نخلص من الليلة دي

الشرط التاني بقى

انك تصبر ومتستعجلش

وللأسف في ناس تقول دعيت وربنا مستجابش دي مصيبة على فكرة أنا مش بقدر أقول الكلمة دي عن نفسي

عن أبي هريرة رضي الله عنه قال: قال رسول الله صلى الله عليه وسلم: ((يستجاب لأحدكم ما لم يعجل، يقول: دعوت فلم يستجب لي))

وعنه أنه صلى الله عليه وسلم قال: ((لا يزال يستجاب للعبد ما لم يدع بإثم أو قطيعة رحم، ما لم يستعجل)). قيل: يا رسول الله، ما الاستعجال؟ قال: ((يقول: قد دعوت، وقد دعوت، فلم أر يستجيب لي، فيستحسر عند ذلك، ويدع الدعاء)) - رواه مسلم

أما الشرط الثالث بقى

فظييييييييع بجد ركزوا ده كلنا بنعاني من الشرط ده تقريبا

وهو التوبة في الدعاء انك تعلن رجوعك لربنا

قال بعض السلف : لا تستبطئ الاجابة وقد سددت طرقها بالمعاصي

أنا ان شاء الله ححط قريب قصة واحد بيستغفر ربنا في كل فررررصة قصة رهيبة جدددا ماعلينا

أما عن الشرط الرابع أيها القوم فهو

أن تكون ممن يتحرون اللقمة الحلال

تتحرى هه مش مجرد انك بتاكل لقمة حلال

يعني من الآخر متخنسرش من شنطة الحاجة وتروح تشتري مصاصة

نخش على الشرط الخامس

ااااااااه دي جامدة بجد وهي

حسن الظن بالله عزوجل

عن أبي هريرة رضي الله عنه قال: قال رسول الله صلى الله عليه وسلم: ((ادعوا الله وأنتم موقنون بالإجابة، فإن الله لا يستجيب دعاء من قلب غافل لاه)) - أخرجه الترمذي

وكمان في حديث بحبه أوووووووي

الحديث قدسي يقول تعالى

" أنا عند ظن عبدي بي فليظن عبدي بي ما يشاء "

الشرط السادس بقى عشان نمشي

معلش الشرط ده طويل عشان معظمنا ميعرفش معنى الكلمة دي بالحرف

متتحنكرش

طب حسألك

عارف يعني ايه اعتداء في الدعاء ؟؟

هههههههههههههههه

شوفت طلع ملكش فيها

مهم أوي الكلام ده يا جماعة اقرأوه

أن يسأل الله تعالى ما لا يليق به من منازل الأنبياء.

أو يتنطع في السؤال بذكر تفاصيل يغني عنها العموم.

أو يسأل ما لا يجوز له سؤاله من الإعانة على المحرمات.

أو يسأل ما لا يفعله الله، مثل أن يسأله تخليده إلى يوم القيامة،

أو يسأله أن يرفع عنه لوازم البشرية من الحاجة إلى الطعام والشراب،

أو أن يسأله أن يطلعه على غيبه،

أو يسأله أن يجله من المعصومين،

أو يسأله أن يهب له ولدا من غير زوجة ولا أمة.

أو يرفع صوته بالدعاء، قال ابن جريج: من الاعتداء رفع الصوت بالدعاء.

أو يدعو مع الله تعالى غيره، قال ابن القيم: "أخبر تعالى أنه لا يحب أهل العدوان، وهم الذين يدعون معه غيره، فهؤلاء أعظم المعتدين عدوانا".

أو أن يدعو غير متضرع، بل دعاء مدل، كالمستغني بما عنده، المدل على ربه به، قال ابن القيم: "هذا من أعظم الاعتداء، المنافي لدعاء الضارع الذليل الفقير المسكين من كل جهة في مجموع حالاته، فمن لم يسأل مسألة مسكين متضرع خائف فهو معتد"

الشرط السابع بقى عشان خلاص قربنا نشطب

ان الدعاء ميشغلكش عن فريضة حاضرة

عبادة الوقت يا جماعة يعني عندك ضيوف يبقى لازم تكرمهم مش حتسيبهم يعني وتروح تدعي وعايز دعاءك يستجاب

المهم نخش على اللي بعده

الشرط التامن بقى عشان أنا كدة طولت أوي وأنا نفسي عايز أمشي

بجد النقطة دي خطيرة أوووووووووي خلي بالكم

الأمر بالمعروف والنهي عن المنكر

عن حذيفة رضي الله عنه قال: قال صلى الله عليه وسلم: ((والذي نفسي بيده لتأمرن بالمعروف ولتنهون عن المنكر، أو ليوشكن الله أن يبعث عليكم عقاباً منه، فتدعونه فلا يستجاب لكم)) - رواه الترمذي

والدين يا جماعة يسر

يعني متجعلصش الأمور

لما تنصح حد انصحه بالراحة والنتيجة على ربنا متعملش انت فيها بقى مش عارف ايه

وتزعق

وتقول حرااااااااااااام عليك انت مش عارف انت بتعمل ايه

ده انت ملكش توبة

وتبدأ تلخبط

وبدل ما انت عايز تنصحه بقيت سبب في تضليله

أحب أقول للي بيعمل كدة

حررراااااااااااااااااااااااام علييييييييييييييك ده انت ملكش توبة ده انت عاصي انت فاكر نفسك بتاخد ثواب

ههههههههههههههههه

بعرف أنصح بالراحة صح

مطولش عليكم

ياااااااااااااااه

ده انتوا بتصبروا جامد أوي

وان شاء الله حتصبروا كمان على استجابة الدعاء

يارب تكونوا استفدتم

معععععععععلش

حاجة أخييييييييرة

ياريت تدعولي

ادعي بالحاجة اللي انت عايزها بنفسك هه

وحتلاقي ملائكة بترد عليك

ولك مثله

يلا عيشوا أعدوا طول الليل ادعولي بقى

هههههههههههههه

سلام عليكم

أشكرك لتقديرك واحترامك لي

بسم الله الرحمن الرحيم

شكرا

شكرا لمن أعطيته قلبي ويعاملني هكذا

أحتى في هذه الظروف تظل معاملتك خالية من الاحترام ؟؟؟

لم تجعلني أفكر في عدم صحبتك ؟

ألأنك موقن أني أود صحبتك ؟؟

لو كنت في موضعك لاحترمت من يصر على صحبتي

ألا تضحي من أجلي ؟

أنا أضحي من أجلك وأنا مبتسم وقلبي مبتسم

وللأسف أنت تحترم من هو شديد عليك

ألأني رقيق ؟؟

ألا تحترم رقتي ؟

ولكني سأظل صابرا لأن القلوب بيد الرحمن يقلبها كيف يشاء

لعل الله يبرز لك ما تفعله بقلبي

ولعلك ترجع مرة أخرى من أحن القلوب علي

لا أتهمك ربما تكون لك وجهات نظر

ولكن اعلم أن معاملة المشاعر أرقى مما تفعل

وجزاك الله خيرا على كل شيء

لكن أحبك أن تسأل نفسك هذا السؤال

تخيل لو انت كنت مكاني وأنا أعاملك هذه المعاملة التي لا تقدير فيها لمشاعرك ولا لتفكيرك

وأني لا أستشيرك وأفعل الأشياء لمجرد أني أحس أني أريد فعلها

أرجو أن تجواب على نفسك بصدق يا حبيبي

أستودعك الله

إن لم يكن بك علي غضب فلا أبالي

بسم الله الرحمن الرحيم

رمضان خلاص قرب يخلص

أنا مخنووووووووق ... معملتش حاجة في رمضان

حاسس اني مبقاش ليا قلب

مبقتش أتأثر بأي حاجة .... الدمعة مش بتنزل

حزين على طول

ببتسم مجاملة للآخر ... الأول كنت ببتسم من قلبي

الدنيا ضلمت مرة واحدة

هي مضلمتش مرة واحدة بس ضلمت

نفسي أبقى قريب من ربنا أوووووووووووووي

نفسي أحس بده

نفسي في حاجات كتير بس للأسف بقيت آعد أتمنى فقط

فين الإرادة ؟؟

فين الهدف ؟؟

آعد أقول نفسي في كذا كذا كذا

مبقتش أقرأ

حاجات كتير حلوة لو مستمر فيها فأنا بعملها بقلة

ده لو مستمر أصلا

تهووووووووون انشاء الله

ربنا يوفقكم جميعا ويهدينا كلنا يارب

ويقدر الخير حيث كان ثم يرضينا به

ويدبر لنا فإنا لا نحسن التدبير

نفسي أحضنك جااااااااااااامد

بسم الله الرحمن الرحيم

جيت متأخر هه ؟

كل الناس كتبت عن رمضان من زمان إلا أنا

أنا مكنتش ناسي

بس مكنتش عارف أكتب إيه

أكتب ان أوله رحمة وأوسطه مغفرة وآخره عتق من النار ؟؟

ولا أكتب إن الفريضة بأجر سبعين والنافلة بأخر فريضة ؟؟

ولا أكتب ان رزق العبد في رمضان بيزيد ؟

ولا أكتب ان الشياطين بتسلسل ؟؟

ولا أكتب إن العبد لما يلح في رمضان على ربنا بدعوة معينة مش حيجي رمضان اللي بعده إلا والدعوة دي قد استجيبت ؟؟

ولا أكتب عن صفاء القلوب وراحة البال ؟؟

ولا أكتب أد إيه إحنا محتاجين لرمضان ؟؟

ولا أكتب إن رمضان فرصة وان احنا لازم نعد نخطط حنعمل إيه بالورقة والقلم ؟؟

ولا أكتب عن عطاء ربنا لينا واحنا منستاهلش ؟؟

ولا أكتب عن كمية المعاصي اللي بنرتكبها ؟؟

ولا أكتب عن الحاجات اللي بنسمعها يوميا ؟؟

وبنشوفها

وبنقولها

مش عارف أكتب عن إيه ولا إيه كل اللي أنا فاهمه وحاسس بيه أوي وشايفه فعلا

إن رمضان ده كنز

كنز بجد ... كنز في كل حاجة

عن نفسي أنا كنت مستنيه أووووووووي .... بتخيل رمضان يجسد على هيئة انسان وأحضنه جامد أوي وأقوله إوعى

تمشي أنا محتاجك

لعلك انت الوحيد اللي تشفعلي عن المعاصي اللي بعملها ليل نهار

لعلك تجعل ربنا ينظرلي بعين الرحمة والمغفرة ويعفو عن كل اللي برتكبه في حق نفسي وغيري وديني

من غيرك الشياطين كانت حتكون موجودة طول السنة

من غيرك مكناش رجعنا لنفسنا وتوبنا صح

من غيرك مكنش حد امتنع عن أي عادة سيئة

انت بتخلي الناس يجربوا الحاجات الحلوة حتى لو بيبطلوها بعديك

من غيرك مكنتش البنات جربت تلبس الحجاب

من غيرك مكنش الناس حيحاولوا يبطلوا السجاير

من غيرك مكنش الواحد حيحاول يلازم المصحف

من غيرك مكنش حد حيصلي قيام

من غيرك مكنش حد حيعتزل عشر أيام لربنا بس

وفجأة ألاقي نفسي بحضن الهوا ودراعاتي على الأكتاف المعاكسة

إيه ده رحت فين ؟؟

أنا مسدأت انت جيت تختفي كدة فجأة ؟

حرجع تاني للمعاصي ؟؟

حهجر القرآن تاني ؟؟

حزعل والدي مني تاني ؟؟

حسمع وأشوف وأقول كلام يغضب ربنا تاني ؟؟

لا أرجوك تعالي تاني أنا تعبت أوي ... الدنيا دي صعبة بجد

وحرجع أشتقلك تاني ؟

وتيجي تاني وتمشي فجأة ؟؟

يارب اغفرلي في رمضان وغيره

اللهم بلغنـــــــــــــــــــا رمضــــــــــــــــــان

أستودعكم الله

سلام عليكم ورحمة الله وبركاته

أعد لف زي ما انت عاوز

بسم الله الرحمن الرحيم

أولا بجد بشكر كل اللي دعولي في فترة امتحاناتي سواء كانوا يعرفوني أو لا أو حتى شافوا التدوينة أو لا

الحمد لله الحمد لله الحمد لله جالي تجارة اسكندرية

طبعا لعله خير

على فكرة الدنيا دي غريبة جدا جدا

بصوا للصورة دي ... نعتبر ان الشمس عبارة عن القدر والكواكب دي التخطيط

ساعات تبقى مخطط لحاجات كتييييييييييييييير لكن في الآخر قدر ربنا اللي بيحقق

سبحان الله بجد

عارفين

أنا كان نفسي أدخل طب أو علوم ... مجموعي مكنش أد كدة فحولت أدبي على أساس ان البلد التحفة دي ماشية بالمجموع وبس وبتهمل المواهب والميول

جيت السنة دي طبعا قلت أدخل فنون جميلة على أساس موهبتي

قدر ربنا بجد إني أنقص درجات غريبة في الثانوي

غريبة فعلا

عشان أدخل تجارة

سبحان الله

أنا متشوق للمستقبل بجد عايز أعرف حبقى إيه

عارفين

تحفة بجد انك تحس ان العظيم اللي بيخططلك

انت بس خد بالأسباب

هههههههههههههه

طبعا في ناس عارفة اني عدو المذاكرة .... أقرأ وأعمل كل حاجة إلا المذاكرة

بس والله عملت اللي عليا الحمد لله وربنا يعلم

---------------

وفي الآخر عايز أقوللك يا كريم انك واحشني جدا وانشاء الله ترجعلنا من السعودية بسلام

ويارب ييسرلك ويرزقك من حيث لا تحتسب

لو شوفت التدوينة دي خد نصيحتي ليك

ومن يتوكل على الله فهو حسبه

---------------

نفسي أكتب حاجات كتيييييييييييييييييييييييير جدا جدا

وفي مجالات كتيييييييييييييير

يمكن من كترها مش بكتب زي اللي بيحلم يحلم يحلم ويفاجأ إنه واقف في مكانه بعد ما الزمن يعدي

ويمكن عشان مشغول جدا جدا

ويمكن عشان مليش نفس ..... مش عارف بس أنا عايز أكتب يعني

أشوفكم على خير

سلام عليكم ورحمة الله وبركاته

إن مع العسر يسرا

بسم الله الرحمن الرحيم

أنا جيت خلاص مش لازم هتاف ورسايل على الميل عشان أرجع أدون من تاني

ريلاااااااااكس

سيكاهاااااااااااااي

أولا بجد بجد بجد بشكر كل واحد دعالي أني أنجح

وأشكر أكتر كل واحد دعالي إني أكون متفوق في حياتي

عامة أنا جبت

83.5%

الحمد لله

الله أنا مبسوط يا جدعان مالكم أولا أنا أدبي ده غير اني أصلا جايب درجات استحالة أجيبها

مثلا مثلا

ولا بلاش فضايح أحسن خلي الطبق مستور ولا معرفش بيقولوا إيه

المهم إني راضي تماما ومش مدايق خااااالص رغم ان اللي حواليا بيقولوا مجموع مش أد كدة لكني فعلا مبسوط

الحمد لله الكابوس بتاع الثانوي عدى ودخلت في كوابيس تانية من أول ما خلصت امتحان

كوابيس بجد مش بهزار

ومن أول الامتحانات ما خلصت وقفت أي حاجة كنت بعملها بسبب المشاكل

سواء كانت حاجات حلوة أو وحشة

بس طبعا كدة موووووووووش كويس

لذا فلقد قررت ألا أوقف أي عمل لأن الحياة عبارة عن كتلة من المشاكل المكعبلة الملخبطة المعقدة الرزلة العقيمة

ده إيه ده

الحمد لله الحمد لله

فبإذن الله حبدأ أكتب تاني وأدون وأكتب وأدون

طلب صغير بس من كل شبابنا

ادعوا لأخوكو عشان كدة عيب أبقى في المشاكل دي وانتوا مش بتدعوا

لا يا بابي مش أدامي كدة

بعدين كدة وانت لوحدك

حتعملهم علينا ولا إيه

-----------------

كان الله في عونكم جميعا

سلام عليكم

-----------------

تروح وترجع بالسلامة يا كيمو

بسم الله الرحمن الرحيم

يوم الحد اللي فات

خمستاشر جوون ألفين وتمانية

كريم سافر

اه صح انتوا مش عارفين كريم

كيمو يا جدعان حد مش عارفه برضه

ده ضمن أعز أصدقائي بجد

يارب يسهله ويرجعه بالسلامة

يارب يكون شغله حلو ويحب الشغل والشغل يحبه

طبعا كريم مأظنش انه حيقرأ التدوينة دي

بس أنا وهو بندعي لبعض مش محتاجين تدوينات تبين اني مفتقده

القلوب عند بعضها بقى

مش عايز أطول بقى عشان عندي مذاكرة ادعولي بالله عليكو

بس بجد مش عارف ليه أنا مكتوب عليا أفارق كل واحد حبيته

يلا ... لعله خير

لا إله إلا أنت سبحانك ... إني كنت من الظالمين

يا جدعان مشكليش كدة حفتح المدونة تاني لحد الامتحانات

ومشكليش حدون تاني إلا بعد الامتحانات

ياريت أي حد يقرأ البوست ده يدعيلي حتى لو مش عارفني

على الأقل الملايكة حتقوله بنفسها : ولك مثله

معلش دخلت في البوست على طول من سلام ولا حاجة يمكن عشان منفوخ

الله أعلم

طبعا ممكن حد يسأل إيه علاقة الامتحانات بالصورة ؟؟

أنا بقول مفيش علاقة خاااااالص بالامتحانات كامتحانات مش اشكال مش اشكال متشغلوش بالكم بهيس مع نفسي معلش

بجد محتاج دعاءكم

سلام عليكم ورحمة لله وبركاته

ياااااااااااارب مالي سواك

يارب ارحم ضعفي

مخنووووووووق يارب ومفيش غيرك يفرج الهم عني

يارب أنا المسكين

أنا شديد التقصير أنا من ثقلت عليه المعاصي والذنوب حتى اعوج ظهره

أنا اللي محتاجلك يارب ... لو سبتني لنفسي أهلك

أنا عايش برحمتك بيا

عايش بآية من أجمل الآيات واللي والدي علمهالي

" ومن يتق الله يجعل له مخرجا ويرزقه من حيث لا يحتسب ... ومن يتوكل على الله فهو حسبه "

عايش بيها وبخالفها كتييييييير

يارب أعني على تقوتك

وارزق والدي أعلى درجات الجنة بسبب تعليمي هذه الآية العظيمة

والدي الذي كان قدوة في تنفيذ هذه الآية ليس مجرد إرشاد

ولا تتركني إلى نفسي يا حبيبي يا رب

اللهم لك الحمد كله ... ولك الشكر كله ... وإليك يرجع الأمر كله

بسم الله الرحمن الرحيم

كان عندي بطولة كونغوفو أول إمبارح على مستوى اسكندرية والحمد لله أخذت مركز رابع

وحسافر يوم الأربعاء القادم انشاء الله القاهرة لخوض بطولة الجمهورية

يا جماعة أنا بس طالب منكم الدعاااااااااااااااء ..... الدعاء اللي من القلب هه ؟؟

بالله عليكم ادعولي أجيب مركز أول جمهورية

ممكن بقى تسيبوني أدعي أنا ؟؟

ياربي لك الحمد ... الحمد لله ... اللهم لك الحمد حتى ترضى ولك الحمد إذا رضيت ولك الحمد بعد الرضى

يارب وفقتني كتيييييييييييييير أوي

كنت متكسر لحد قبل البطولة بيومين وخفين قبلها بيوم

ساعدتني إني أخس خمسة كيلو في ثلاث أيام

لعبت لعب مكنتش متخيله

وفقتني إني أعمل حركة محدش في الجمهورية بيعملها ومش بعيد في الوطن العربي كمان

وفقتني إني أكسب ماتشين و أوصل لحد دور الأربعة

ووفقتني إني أكسب أول جولة في ثالث ماتش وكان خصمي فيها بطل جمهورية بقاله كام سنة وأنا أول مرة ألعب

وحتى لما خسرت الحكم قال في الميكروفون للناس يحيونا إحنا الاتنين بغض النظر مين اللي كسب لأن مستوانا إحنا الاتنين كان عالي أوي وده كان أحسن ماتش إتلعب في البطولة

وبفضلك يارب إتشهرت وبقى ليا إسم في الصالة

سبحانك يارب ... بعزتك وجلالك مستحي من كمية عطائك برغم تقصيري الشديييييييييييد

سبحانك يارب ... لعل خسارتي في الدور الرابع كانت هي الخير لي .... بل أنا متأكد من ذلك

الحمد للللللللله ... الحمد لله ملئ السماوات وملئ الأرض وملئ ما بينهما

الحمد لله عدد قطرات الماء

الحمد لللللللللله

يارب يارب أنا عملت اللي عليا وتوكلت عليك وتعبت أوي في التمرين وفي البيت تعبوا معايا بسبب الأكل المخصوص والمصاريف والمدرب تعب مع الفريق وكان بينزل يقابلنا في حاجات غير التمرين عشان نتمرن تمارين إضافية

يارب أنا مش عايزك ترزقني على مقدار مجهودي أنا عايزك توفقني بقدرتك ورحمتك

اللي أنا عملته كان أخذ بالأسباب فقط

فاقدر الخير حيث كان ثم ارضني به

آمين

قولوا آميييييييييين وادعولي انتوا كمان من عندكم

وتذكروا إن في ملائكة حترد عليك تقولك ولك مثله

وشكرا لصبركم يلا سلام

كان نفسي عيني تشوف ملامحك

بسم الله الرحمن الرحيم

" خرج النبى على أصحابه يوما فقال لهم : وددت لو أرى إخوانى ؟ قالوا : أولسنا إخوانك يا رسول الله ؟ قال : أنتم أصحابى , إخوانى قوم يأتون من بعدكم يؤمنون بى ولم يرونى "

بجد وحشتني أوووووووووووووووووي يارسول الله نفسي أقول كلام كتير لكن أنا طبعا مش حعرف أتكلم عن النبي أحسن من الأستاذ جمال ماضي

بس الأول اسمعوا الأغنية دي جامدة جداااااااااااااااااااا ..... لما بسمعها بجد بحس إني نفسي أحضن النبي وأقوله الزمن ده غير أي زمن ... الزمن ده اللي يصبر فيه كالممسك على الجمر

أغنية كان نفسي عيني تشوف ملامحك

يا حبيبي يا رسول الله ( أ / جمال ماضي )

بجد موضوع أكثر من رائع

ياريت تقرأوه ويارب ينال إعجابكم وينبني على إعجابكم أعمال

والسلام عليكم ورحمة الله وبركاته

يارب اتقبل صيام الحاجة بتاع امبارح

بسم الله الرحمن الرحيم

إمبارح كنت صايم صيام محصلش .... عارفين صيام الحاجة ؟؟

أو صيام العيال الصغيرة كل ميجوع ياكل

كان كدة بقى

أنا من أول ما صحيت فطرت مع الأسرة وأنا أصلا كنت ناوي أصوم .... وبعد كدة شربت الشاي

وعادي خالص

بعد كدة افتكرت إني صايم فكملت صيام .... بعد كدة كان عندي درس قرآن

والدتي دخلتلي شاي مع الأستاذ وأنا بشربه افتكرت .... ههههههههههههههههه ..... فقولت كدة ميصحش بصراحة

النسيان ساعات بيكون حلو أووووووووووووي

يارب يتقبل الصيام .. أنا طبعا نظرا لأن مسألة النسيان في غير رمضان مختلف فيها فأنا كملت صيام ويارب يتقبله ... وطبعا ربنا كرمه ورحمته وسعت كل شيء .... والحمد لله أكيد أخدت الثواب

بس كان صيام جمييييييييل أوي لدرجة إني مأكلتش لما المغرب أذن غير كيس بسكوت لأن كان عندي تمرين وأنا مينفعش آكل قبل التمرين

يلا عشان مطولش عليكم سلام

عارف يعني إيه قلب بيتقطع ؟؟؟

بسم الله الرحمن الرحيم

بالنسبة للصورة دي المفروض تبقى

I have no heart

or

I haven't my heart

or

I fulled of sadness

or any thing else

حححححححححححح

والسلام عليكم ورحمة الله وبركاته

نعمة كبييييييييرة مش واخدين بالنا منها

بسم الله الرحمن الرحيم

إيه رأيكم في الصور أظن جميلة أوي .... وهي فعلا مكتبة اسكندرية جميلة أوي

عارفين الدلع ؟؟

هي بقى آخر دلع وانت برة ممكن تحط شنطتك في الأمانات وأي حاجة انت عايز تحطها في الأمانات ..... آعد على مكتب لوحدك .... اللمبة أدامك .... النت جمبك ..... لو حبيت تطلع تشرب أو تاكل وتدخل تاني ... مكتبة بجد جميلة أوووووووي

صوت مفيش ... دوشة مفيش

ممكن تعد تعمل اللي انت عاوزه ...... جميع أنواع الكتب موجودة .... ممكن تعد تذاكر ... أصلا مهما كانت مليانة تحس انك آعد لوحدك

ده انت كمان ممكن لو معاك حد بيذاكر معاك ممكن تنام على المكتب شوية ويصحيك

بجد أنا شايف إن المكتبة دي طفرة في اسكندرية احنا مش حاسسين بيها

هههههههههههه وأحلى حاجة في المكتبة إن اشتراكها ثلاثين جنيه في السنة

حد كدة يجرب يروحها مرة بس لو معجبتهوش بلاش يدعي عليا يا إما ميروحش من دلوقتي

يلا سلام عليكم

حتوحشني يا كابتن ياسر

بسم الله الرحمن الرحيم

أنا مش عارف أنا فرحان ولا زعلان ..... النهاردة كابتن ياسر حيسافر دبي حيدرب كونغوفو هناك ..... كابتن ياسر كان مدربي من وأنا في أولى ابتدائي يعني يعتبر إتربيت معاه .... طبعا في أيام حلوة كتير أنا فاكر مرة كنت بلعب ماتش وأنا مصاب في رجلي وكان ممنوع ألعب ماتش وأنا مصاب فمثلت كأني عادي وكنت بحاول معرجش في الماتش ... الحقيقة أنا خسرت في الماتش مش عارف ليه حتى الكابتن اتعارك مع الحكام بس وأنا طالع باسني وقالي حاجة في ودني مش فاكرها لأني كنت زعلان لأنها كانت بطولة جمهورية وكنت أول مرة أدخلها

طبعا بعدها بطلت عشان امتحانات اعدادية وبعدها دخلت الثانوية وأديني رجعت أهو .... رجعت لقيته اتغير كتير مبقاش بيقبلني مش عارف ليه ... طبعا مش عشان سيبت التدريب بس مبقاش بيقبلني .... كنت بدايق منه كتير عشان طريقة اهتمامه بالمتدربين غريبة شوية لكني متعلق بيه ... كنت لما آجي أكلمه أحس إنه مش مقتنع بيا .. لما أقوله مثلا أنا بحاول أطور نفسي في اللعبة وبطلع أتدرب على البحر مكنش بيهتم ومكنش بيفدني من خبراته وكنت بحس إنه عايز يقولي متتمرن على البحر براحتك أعملك إيه يعني ... بقى بيني وبينه التدريب .... كنت بحاول أصاحبه لكن هو كان بيفضل ناس معينة وأنا مش من ضمنهم

بس أنا متأكد إنه بيحبني لأنه حضني قبل ما يسافر ..... بس حسيت ساعتها إني مكنتش فاهمه صح ... يمكن يكون مهتم بس مش بيظهر أو عايز يشوفني حستمر لوحدي ولا لا .... مش عارف أنا كنت مدايق منه لكن لما سمعت إنه حيسافر حسيت إني حفقد مدرب ليه مكان عندي مكانش مجرد مدرب هو كان أخ بصراحة

شخصيته فعلا جميلة ... بيفكر في الحاجة قبل ما يعملها بيوزن الأمور بعقله مش متهور

يارب يسهله أموره هناك والشغل يكون حلو والبلية تلعب معاه ويرجع بخير ويفيد الاسلام بخبرته

حتوحشني أوي يا كوتش

والسلام عليكم ورحمة الله وبركاته

Happy Valantine Day

بسم الله الرحمن الرحيم

النهاردة طبعا 14/2/2008 عيد الحب

النهاردة طبعا كنت واقف على البحر زي ما بقف على طول بهدف التأمل وطبعا مش في دماغي إن النهاردة يوم المعاصي العلني وشوفت مناظر رهيبة فأخدت بعضي كدة بالزوق وعدت من حيث أتيت

ربنا يعافينا يارب ويثبتنا على الحق

ولكني أريد أن أقدم هدية في هذا اليوم لأخي الحبيب وصديقي القريب والأخ الكبير الحنون مش مهم إسمه بس المهم إني بحبه جدا جدا جدا

والهدية هي ... يارب يعجلك بالزواج يا عامر وبسرعة بسرعة تكمل تجهيزاتك وتكتب كتابك وتدخل في يوم واحد انشاء الله

قولوا آمين يا جدعااااااان

والسلام عليكم ورحمة الله وبركاته

هاي شلة

بسم الله الرحمن الرحيم

إيه يا شباب عاملين إيه ؟؟؟ ... إيه أخبار صحتكم ؟؟؟ ... إيه أخبار نفسيتكم ؟؟؟ ... يارب تكونوا بخير

بصوا بقى بداية كدة أنا أموت في النقد .... أحب النقد موت عشان أتعلم من خبرات غيري ... أنا الحقيقة حتكلم في موضوع كثييييييييير من الشباب مخالفين فيه لرأيي ..... وكثيييييييير منهم يؤيدوني ....... ونسبة كبيرة منهم تؤيدني ولكنها فعليا تخالفني

أرجوكم بس ياريت اللي حيقرأ سواء عجبه الكلام أو معجبهوش يكمل الموضوع لآخره لأنه لو مش عاجبه حينقد ولو عاجبه حيأيدني

صلوا عالنبي يا شلة ... مين فينا في كلية ؟؟ ..... أكيد إنتم أنا لسة في ثانوية عامة ... أنا آه في ثانوية لكن حتكلم في حاجة تخصكم انتم ياللي في كليات أو معاهد أو جامعات ... بليز أنصتوا

طبعا بنشوف في الكليات الإختلاط بجميع أنواعه .... اللي معاه بنتين والشلة اللي ولاد على بنات واللي بيهزروا بصوت عالي والبنات اللي بتضحك بصوت عالي وأحيانا بتحس إنهم مبقتش تفرق معاهم دي بنت ولا ولد ... والحجة زمايل .... وبقى في مفهوم منتشر جدددددددددا ويمكن بقى عرف كمان فيقولك (أصحاب) عادي ممكن الشلة تخرج مع بعضها ولاد على بنات وفريييي خالص وده منتشر جدددددددددا أنا مش بتكلم خيال ولا بخترع أنا واحد متضرر من هذا الموضوع

وكمان بنشوف بشر بجميع الأشكال .... من اللي آخد بشلة في وشه ومطوته معاه لحد اللي مولود في بقه معلقة ذهب

الكلام ده كلنا بنشوفه يوميا ... بس هل ده صح ؟؟ .... هل مفهوم الصحاب ده صح ؟؟ ... هل مفهوم الزمالة ده صح ؟؟ ...هل الخروجات دي والتي أرى أنها ساعات بتذهب بأوثة المرأة صحيحة ؟؟ ....أسئلة كتيييييييييييييييير

طيب خلينا ندخل في الواقع أكتر

تدخل جوة الكلية مثلا مجمع نظري في اسكندرية حتشوف مناظر رهيبة ... رهيبة بجد ودي بعض الصور اللي جايبها من موقع جامعة أون لاين

وطبعا ده جزيء وليس جزء من اللي بيحصل لأن الباقي صور لا أستطيع نشرها على المدونة وفي الحقيقة برضه على الموقع منشروهاش وكلكم عارفين كدة ولا إيه جدعان ؟؟؟

طيب نطلع بره الكلية ونضر الناس اللي لسة صغيرة وملهاش ذنب ونخليهم يقلدوا الكبار ... إطلع كدة عالبحر جرب كدة واطلع عالبحر الساعة 1:30 أو 2:00 وعينك متشوف إلا النور بجد مناظر أنا في غنى إني أشرحها ... أنا مش عايز أقولكم أنها مناظر أفظع من اللي في الكلية وانتم أدرى طبعا

طيب الصبح خلص تعالى كدة روح الجنينة اللي أمام مكتبة اسكندرية .... اه الدنيا ضلمة هناك بس برضه عينك متشوف إلا النور ..... قولولي بالله عليكم اللي بيحصل ده صح ؟؟؟ ... حتى لو خطيبها ولا حتى كاتب كتابه ولا حتى متجوز لما يعد معاها بالمناظر اللي كلنا بنشوفها ده صح ؟؟؟؟؟؟؟؟؟؟؟؟؟؟؟؟

بجد سبحان الله .... الأخلاق راحت فين .... احنا فعلا فعلا محتاجين نغلب شهوتنا عشان نرجع أمة عزيزة

ححححححح .... أنا عايز أقولكم ان .... الحب بريء من اللي بيحصل ده

فعلا صدق حبيبي النبي عليه الصلاة والسلام لما قال:"إن لم تستحي فاصنع ما شئت" ..... صدقت يارسول الله

والسلام عليكم ورحمة الله وبركاته

إثنــــــــان تحابـــــــا في الله

بسم الله الرحمن الرحيم

قال صلى الله عليه وسلم: 'إن الله يقول يوم القيامة: أين المتحابون بجلالي اليوم أظلهم في ظلي يوم لا ظل إلا ظلي'. [أخرجه مسلم باب فضل الحب في الله]

تعجبت فعلا من هذا الحديث كما تعجبت من حديث آخر

عن أبي هريرة رضي الله عنه عن النبي صلى الله عليه وسلم قال : سبعة يظلهم الله في ظلّله يوم لا ظلّ إلا ظلّه: إمام عادل ,شاب نشأ في عبادة الله عز وجل , رجل قلبه معلق بالمساجد , ورجلان تحابا في الله اجتمعا عليه وتفرقا عليه , ورجل دعته امرأة ذات حسن وجمال فقال إني أخاف الله , ورجل تصدق بصدقة فأخفاها حتى لاتعلم شماله ماتنفق يمينه , ورجل ذكر الله خاليا فاضت عيناه .... متفق عليه

كنت أتساءل دائما لماذا استحق هؤلاء أن يظلهم الله في هذا الوقت العصيب .... أكيد دي حاجات صعبة جدا جدا

فمسكت واحدة واحدة وفعلا كانوا صعبين ويستاهلوا إن ثوابهم يكون كبير أوي ولكن جيت عند إثنان تحابا في الله اجتمعا عليه وتفرقا عليه ووقفت .... وقولت هو الحب في الله صعب أوي كدة عشان يكون ثوابه كدة ؟؟؟

عادي ممكن واحد يحب واحد صحبه إيه المشكلة كلنا بنحب بعض ونزهق من بعض ونغير صحابنا ونرجع للصحاب القدامى تاني

هل الموضوع صعب للدرجة دي ؟؟؟

ففكرت في العلاقات بتاعة دلوقتي فحزنت ولقيتها معظمها بالطريقة دي أو غالبا يكون الاثنين مع بعض في الشغل ممكن يتعلقوا ببعض ويتصلوا ببعض وكدة لكن مجرد ما ينفصلوا ..... بحححححححح فحسيت ان الموضوع فعلا صعب ..... وخاصة ان رجلان تحابا في الله جاءت في الحديث قبل رجل دعته امرأة ذات حسن وجمال

بس فعلا الموضوع مهم أوي ..... أصل الصاحب ده كل حاجة هو اللي بيعينك على الطاعة وهو اللي بيعينك على المعصية ..... هو اللي بيساعدك ويقف جمبك وقت الشدة مش مجرد خروجات وتليفونات الموضوع كبييييييير فعلا ولكن ده اللي جوايا

وهذه الكلمة كلمتي ... ولكنها ليست دعوة للتشاؤم

في هذا الزمن يصعب أن تجد صديق يجمع بين الدين والدنيا ... فحاول أن تكون أنت هذا الرجل

والسلام عليكم ورحمة الله وبركاته