اللهم لك الحمد كله ... ولك الشكر كله ... وإليك يرجع الأمر كله

بسم الله الرحمن الرحيم

كان عندي بطولة كونغوفو أول إمبارح على مستوى اسكندرية والحمد لله أخذت مركز رابع

وحسافر يوم الأربعاء القادم انشاء الله القاهرة لخوض بطولة الجمهورية

يا جماعة أنا بس طالب منكم الدعاااااااااااااااء ..... الدعاء اللي من القلب هه ؟؟

بالله عليكم ادعولي أجيب مركز أول جمهورية

ممكن بقى تسيبوني أدعي أنا ؟؟

ياربي لك الحمد ... الحمد لله ... اللهم لك الحمد حتى ترضى ولك الحمد إذا رضيت ولك الحمد بعد الرضى

يارب وفقتني كتيييييييييييييير أوي

كنت متكسر لحد قبل البطولة بيومين وخفين قبلها بيوم

ساعدتني إني أخس خمسة كيلو في ثلاث أيام

لعبت لعب مكنتش متخيله

وفقتني إني أعمل حركة محدش في الجمهورية بيعملها ومش بعيد في الوطن العربي كمان

وفقتني إني أكسب ماتشين و أوصل لحد دور الأربعة

ووفقتني إني أكسب أول جولة في ثالث ماتش وكان خصمي فيها بطل جمهورية بقاله كام سنة وأنا أول مرة ألعب

وحتى لما خسرت الحكم قال في الميكروفون للناس يحيونا إحنا الاتنين بغض النظر مين اللي كسب لأن مستوانا إحنا الاتنين كان عالي أوي وده كان أحسن ماتش إتلعب في البطولة

وبفضلك يارب إتشهرت وبقى ليا إسم في الصالة

سبحانك يارب ... بعزتك وجلالك مستحي من كمية عطائك برغم تقصيري الشديييييييييييد

سبحانك يارب ... لعل خسارتي في الدور الرابع كانت هي الخير لي .... بل أنا متأكد من ذلك

الحمد للللللللله ... الحمد لله ملئ السماوات وملئ الأرض وملئ ما بينهما

الحمد لله عدد قطرات الماء

الحمد لللللللللله

يارب يارب أنا عملت اللي عليا وتوكلت عليك وتعبت أوي في التمرين وفي البيت تعبوا معايا بسبب الأكل المخصوص والمصاريف والمدرب تعب مع الفريق وكان بينزل يقابلنا في حاجات غير التمرين عشان نتمرن تمارين إضافية

يارب أنا مش عايزك ترزقني على مقدار مجهودي أنا عايزك توفقني بقدرتك ورحمتك

اللي أنا عملته كان أخذ بالأسباب فقط

فاقدر الخير حيث كان ثم ارضني به

آمين

قولوا آميييييييييين وادعولي انتوا كمان من عندكم

وتذكروا إن في ملائكة حترد عليك تقولك ولك مثله

وشكرا لصبركم يلا سلام

كان نفسي عيني تشوف ملامحك

بسم الله الرحمن الرحيم

" خرج النبى على أصحابه يوما فقال لهم : وددت لو أرى إخوانى ؟ قالوا : أولسنا إخوانك يا رسول الله ؟ قال : أنتم أصحابى , إخوانى قوم يأتون من بعدكم يؤمنون بى ولم يرونى "

بجد وحشتني أوووووووووووووووووي يارسول الله نفسي أقول كلام كتير لكن أنا طبعا مش حعرف أتكلم عن النبي أحسن من الأستاذ جمال ماضي

بس الأول اسمعوا الأغنية دي جامدة جداااااااااااااااااااا ..... لما بسمعها بجد بحس إني نفسي أحضن النبي وأقوله الزمن ده غير أي زمن ... الزمن ده اللي يصبر فيه كالممسك على الجمر

أغنية كان نفسي عيني تشوف ملامحك

يا حبيبي يا رسول الله ( أ / جمال ماضي )

بجد موضوع أكثر من رائع

ياريت تقرأوه ويارب ينال إعجابكم وينبني على إعجابكم أعمال

والسلام عليكم ورحمة الله وبركاته

يارب اتقبل صيام الحاجة بتاع امبارح

بسم الله الرحمن الرحيم

إمبارح كنت صايم صيام محصلش .... عارفين صيام الحاجة ؟؟

أو صيام العيال الصغيرة كل ميجوع ياكل

كان كدة بقى

أنا من أول ما صحيت فطرت مع الأسرة وأنا أصلا كنت ناوي أصوم .... وبعد كدة شربت الشاي

وعادي خالص

بعد كدة افتكرت إني صايم فكملت صيام .... بعد كدة كان عندي درس قرآن

والدتي دخلتلي شاي مع الأستاذ وأنا بشربه افتكرت .... ههههههههههههههههه ..... فقولت كدة ميصحش بصراحة

النسيان ساعات بيكون حلو أووووووووووووي

يارب يتقبل الصيام .. أنا طبعا نظرا لأن مسألة النسيان في غير رمضان مختلف فيها فأنا كملت صيام ويارب يتقبله ... وطبعا ربنا كرمه ورحمته وسعت كل شيء .... والحمد لله أكيد أخدت الثواب

بس كان صيام جمييييييييل أوي لدرجة إني مأكلتش لما المغرب أذن غير كيس بسكوت لأن كان عندي تمرين وأنا مينفعش آكل قبل التمرين

يلا عشان مطولش عليكم سلام

عارف يعني إيه قلب بيتقطع ؟؟؟

بسم الله الرحمن الرحيم

بالنسبة للصورة دي المفروض تبقى

I have no heart

or

I haven't my heart

or

I fulled of sadness

or any thing else

حححححححححححح

والسلام عليكم ورحمة الله وبركاته

نعمة كبييييييييرة مش واخدين بالنا منها

بسم الله الرحمن الرحيم

إيه رأيكم في الصور أظن جميلة أوي .... وهي فعلا مكتبة اسكندرية جميلة أوي

عارفين الدلع ؟؟

هي بقى آخر دلع وانت برة ممكن تحط شنطتك في الأمانات وأي حاجة انت عايز تحطها في الأمانات ..... آعد على مكتب لوحدك .... اللمبة أدامك .... النت جمبك ..... لو حبيت تطلع تشرب أو تاكل وتدخل تاني ... مكتبة بجد جميلة أوووووووي

صوت مفيش ... دوشة مفيش

ممكن تعد تعمل اللي انت عاوزه ...... جميع أنواع الكتب موجودة .... ممكن تعد تذاكر ... أصلا مهما كانت مليانة تحس انك آعد لوحدك

ده انت كمان ممكن لو معاك حد بيذاكر معاك ممكن تنام على المكتب شوية ويصحيك

بجد أنا شايف إن المكتبة دي طفرة في اسكندرية احنا مش حاسسين بيها

هههههههههههه وأحلى حاجة في المكتبة إن اشتراكها ثلاثين جنيه في السنة

حد كدة يجرب يروحها مرة بس لو معجبتهوش بلاش يدعي عليا يا إما ميروحش من دلوقتي

يلا سلام عليكم

حتوحشني يا كابتن ياسر

بسم الله الرحمن الرحيم

أنا مش عارف أنا فرحان ولا زعلان ..... النهاردة كابتن ياسر حيسافر دبي حيدرب كونغوفو هناك ..... كابتن ياسر كان مدربي من وأنا في أولى ابتدائي يعني يعتبر إتربيت معاه .... طبعا في أيام حلوة كتير أنا فاكر مرة كنت بلعب ماتش وأنا مصاب في رجلي وكان ممنوع ألعب ماتش وأنا مصاب فمثلت كأني عادي وكنت بحاول معرجش في الماتش ... الحقيقة أنا خسرت في الماتش مش عارف ليه حتى الكابتن اتعارك مع الحكام بس وأنا طالع باسني وقالي حاجة في ودني مش فاكرها لأني كنت زعلان لأنها كانت بطولة جمهورية وكنت أول مرة أدخلها

طبعا بعدها بطلت عشان امتحانات اعدادية وبعدها دخلت الثانوية وأديني رجعت أهو .... رجعت لقيته اتغير كتير مبقاش بيقبلني مش عارف ليه ... طبعا مش عشان سيبت التدريب بس مبقاش بيقبلني .... كنت بدايق منه كتير عشان طريقة اهتمامه بالمتدربين غريبة شوية لكني متعلق بيه ... كنت لما آجي أكلمه أحس إنه مش مقتنع بيا .. لما أقوله مثلا أنا بحاول أطور نفسي في اللعبة وبطلع أتدرب على البحر مكنش بيهتم ومكنش بيفدني من خبراته وكنت بحس إنه عايز يقولي متتمرن على البحر براحتك أعملك إيه يعني ... بقى بيني وبينه التدريب .... كنت بحاول أصاحبه لكن هو كان بيفضل ناس معينة وأنا مش من ضمنهم

بس أنا متأكد إنه بيحبني لأنه حضني قبل ما يسافر ..... بس حسيت ساعتها إني مكنتش فاهمه صح ... يمكن يكون مهتم بس مش بيظهر أو عايز يشوفني حستمر لوحدي ولا لا .... مش عارف أنا كنت مدايق منه لكن لما سمعت إنه حيسافر حسيت إني حفقد مدرب ليه مكان عندي مكانش مجرد مدرب هو كان أخ بصراحة

شخصيته فعلا جميلة ... بيفكر في الحاجة قبل ما يعملها بيوزن الأمور بعقله مش متهور

يارب يسهله أموره هناك والشغل يكون حلو والبلية تلعب معاه ويرجع بخير ويفيد الاسلام بخبرته

حتوحشني أوي يا كوتش

والسلام عليكم ورحمة الله وبركاته

Happy Valantine Day

بسم الله الرحمن الرحيم

النهاردة طبعا 14/2/2008 عيد الحب

النهاردة طبعا كنت واقف على البحر زي ما بقف على طول بهدف التأمل وطبعا مش في دماغي إن النهاردة يوم المعاصي العلني وشوفت مناظر رهيبة فأخدت بعضي كدة بالزوق وعدت من حيث أتيت

ربنا يعافينا يارب ويثبتنا على الحق

ولكني أريد أن أقدم هدية في هذا اليوم لأخي الحبيب وصديقي القريب والأخ الكبير الحنون مش مهم إسمه بس المهم إني بحبه جدا جدا جدا

والهدية هي ... يارب يعجلك بالزواج يا عامر وبسرعة بسرعة تكمل تجهيزاتك وتكتب كتابك وتدخل في يوم واحد انشاء الله

قولوا آمين يا جدعااااااان

والسلام عليكم ورحمة الله وبركاته

هاي شلة

بسم الله الرحمن الرحيم

إيه يا شباب عاملين إيه ؟؟؟ ... إيه أخبار صحتكم ؟؟؟ ... إيه أخبار نفسيتكم ؟؟؟ ... يارب تكونوا بخير

بصوا بقى بداية كدة أنا أموت في النقد .... أحب النقد موت عشان أتعلم من خبرات غيري ... أنا الحقيقة حتكلم في موضوع كثييييييييير من الشباب مخالفين فيه لرأيي ..... وكثيييييييير منهم يؤيدوني ....... ونسبة كبيرة منهم تؤيدني ولكنها فعليا تخالفني

أرجوكم بس ياريت اللي حيقرأ سواء عجبه الكلام أو معجبهوش يكمل الموضوع لآخره لأنه لو مش عاجبه حينقد ولو عاجبه حيأيدني

صلوا عالنبي يا شلة ... مين فينا في كلية ؟؟ ..... أكيد إنتم أنا لسة في ثانوية عامة ... أنا آه في ثانوية لكن حتكلم في حاجة تخصكم انتم ياللي في كليات أو معاهد أو جامعات ... بليز أنصتوا

طبعا بنشوف في الكليات الإختلاط بجميع أنواعه .... اللي معاه بنتين والشلة اللي ولاد على بنات واللي بيهزروا بصوت عالي والبنات اللي بتضحك بصوت عالي وأحيانا بتحس إنهم مبقتش تفرق معاهم دي بنت ولا ولد ... والحجة زمايل .... وبقى في مفهوم منتشر جدددددددددا ويمكن بقى عرف كمان فيقولك (أصحاب) عادي ممكن الشلة تخرج مع بعضها ولاد على بنات وفريييي خالص وده منتشر جدددددددددا أنا مش بتكلم خيال ولا بخترع أنا واحد متضرر من هذا الموضوع

وكمان بنشوف بشر بجميع الأشكال .... من اللي آخد بشلة في وشه ومطوته معاه لحد اللي مولود في بقه معلقة ذهب

الكلام ده كلنا بنشوفه يوميا ... بس هل ده صح ؟؟ .... هل مفهوم الصحاب ده صح ؟؟ ... هل مفهوم الزمالة ده صح ؟؟ ...هل الخروجات دي والتي أرى أنها ساعات بتذهب بأوثة المرأة صحيحة ؟؟ ....أسئلة كتيييييييييييييييير

طيب خلينا ندخل في الواقع أكتر

تدخل جوة الكلية مثلا مجمع نظري في اسكندرية حتشوف مناظر رهيبة ... رهيبة بجد ودي بعض الصور اللي جايبها من موقع جامعة أون لاين

وطبعا ده جزيء وليس جزء من اللي بيحصل لأن الباقي صور لا أستطيع نشرها على المدونة وفي الحقيقة برضه على الموقع منشروهاش وكلكم عارفين كدة ولا إيه جدعان ؟؟؟

طيب نطلع بره الكلية ونضر الناس اللي لسة صغيرة وملهاش ذنب ونخليهم يقلدوا الكبار ... إطلع كدة عالبحر جرب كدة واطلع عالبحر الساعة 1:30 أو 2:00 وعينك متشوف إلا النور بجد مناظر أنا في غنى إني أشرحها ... أنا مش عايز أقولكم أنها مناظر أفظع من اللي في الكلية وانتم أدرى طبعا

طيب الصبح خلص تعالى كدة روح الجنينة اللي أمام مكتبة اسكندرية .... اه الدنيا ضلمة هناك بس برضه عينك متشوف إلا النور ..... قولولي بالله عليكم اللي بيحصل ده صح ؟؟؟ ... حتى لو خطيبها ولا حتى كاتب كتابه ولا حتى متجوز لما يعد معاها بالمناظر اللي كلنا بنشوفها ده صح ؟؟؟؟؟؟؟؟؟؟؟؟؟؟؟؟

بجد سبحان الله .... الأخلاق راحت فين .... احنا فعلا فعلا محتاجين نغلب شهوتنا عشان نرجع أمة عزيزة

ححححححح .... أنا عايز أقولكم ان .... الحب بريء من اللي بيحصل ده

فعلا صدق حبيبي النبي عليه الصلاة والسلام لما قال:"إن لم تستحي فاصنع ما شئت" ..... صدقت يارسول الله

والسلام عليكم ورحمة الله وبركاته

إثنــــــــان تحابـــــــا في الله

بسم الله الرحمن الرحيم

قال صلى الله عليه وسلم: 'إن الله يقول يوم القيامة: أين المتحابون بجلالي اليوم أظلهم في ظلي يوم لا ظل إلا ظلي'. [أخرجه مسلم باب فضل الحب في الله]

تعجبت فعلا من هذا الحديث كما تعجبت من حديث آخر

عن أبي هريرة رضي الله عنه عن النبي صلى الله عليه وسلم قال : سبعة يظلهم الله في ظلّله يوم لا ظلّ إلا ظلّه: إمام عادل ,شاب نشأ في عبادة الله عز وجل , رجل قلبه معلق بالمساجد , ورجلان تحابا في الله اجتمعا عليه وتفرقا عليه , ورجل دعته امرأة ذات حسن وجمال فقال إني أخاف الله , ورجل تصدق بصدقة فأخفاها حتى لاتعلم شماله ماتنفق يمينه , ورجل ذكر الله خاليا فاضت عيناه .... متفق عليه

كنت أتساءل دائما لماذا استحق هؤلاء أن يظلهم الله في هذا الوقت العصيب .... أكيد دي حاجات صعبة جدا جدا

فمسكت واحدة واحدة وفعلا كانوا صعبين ويستاهلوا إن ثوابهم يكون كبير أوي ولكن جيت عند إثنان تحابا في الله اجتمعا عليه وتفرقا عليه ووقفت .... وقولت هو الحب في الله صعب أوي كدة عشان يكون ثوابه كدة ؟؟؟

عادي ممكن واحد يحب واحد صحبه إيه المشكلة كلنا بنحب بعض ونزهق من بعض ونغير صحابنا ونرجع للصحاب القدامى تاني

هل الموضوع صعب للدرجة دي ؟؟؟

ففكرت في العلاقات بتاعة دلوقتي فحزنت ولقيتها معظمها بالطريقة دي أو غالبا يكون الاثنين مع بعض في الشغل ممكن يتعلقوا ببعض ويتصلوا ببعض وكدة لكن مجرد ما ينفصلوا ..... بحححححححح فحسيت ان الموضوع فعلا صعب ..... وخاصة ان رجلان تحابا في الله جاءت في الحديث قبل رجل دعته امرأة ذات حسن وجمال

بس فعلا الموضوع مهم أوي ..... أصل الصاحب ده كل حاجة هو اللي بيعينك على الطاعة وهو اللي بيعينك على المعصية ..... هو اللي بيساعدك ويقف جمبك وقت الشدة مش مجرد خروجات وتليفونات الموضوع كبييييييير فعلا ولكن ده اللي جوايا

وهذه الكلمة كلمتي ... ولكنها ليست دعوة للتشاؤم

في هذا الزمن يصعب أن تجد صديق يجمع بين الدين والدنيا ... فحاول أن تكون أنت هذا الرجل

والسلام عليكم ورحمة الله وبركاته

ماذا لو قال لك أحدهم لا تصلي ؟؟

بسم الله الرحمن الرحيم

الحقيقة أنا اليومين دول بتحصل معايا مواقف غرييييييييييبة الشكل ..... بس خلينا نتعلم من أخطاءنا ونتعلم من المواقف اللي تعدي علينا

أنا الأول أحكيلكم الموقف اللي حصل

كان عندي درس عربي .. الأستاذ بسم الله ماشاء الله متميز جددددددا في مادته .. جت أجازة نصف العام فعملنا كورس نحو .. وهو عبارة عن درس يوميا لمدة أسبوع .. المشكلة مش في كل ده .. المشكلة إن المغرب بيأذن علينا واحنا في الدرس فكان الأستاذ يدينا تمارين نحلها ويطلع يصلي فكنت بطلع معاه ونرجع نكمل الدرس وأنا أحل التمارين بعدين وأريهاله

المهم ... في اليوم الثالث بقى قالنا نحل تمارين فقولتله ممكن أطلع أصلي مع حضرتك قالي طيب حل ولما أرجع روح صلي .... جمييييييييييل مفيش مشاكل

في اليوم الرابع .... نفس الموضوع وبعد ما رجع من الصلاة قالي استنى لما نراجع الأسئلة عشان انت من المتفوقين اللي عندي وبعد كدة صلي ..... ماااااااااااااااشي مفيش مشاكل .... المشكلة إني كنت برجع من الصلاة ألاقيه بيشرح

المههههههههههم ..... في اليوم الخاااااااامس .... وهو طالع يصلي بستأذنه أصلي معاه قالي حاجة غريبة جدددددددددددا * "حبيبي انت عايز تحسسنا إنت مسلم والباقي دول كفار ... كلنا مسلمين يا حبيبي حتصلي متقلقش بلاش تبقى كدة "

فطبعا أنا ظنا مني إنه عايز يوصل رسالة لباقية التلاميذ فرديت عليه

- " أستاذي .. الصلاة فرض مهما حصل مينفعش نفوت الصلاة "

فقالي بلهجة غريبة جددددددا

* " وهي المذاكرة مش عبادة ؟؟؟ "

- " لا عبادة بس إحنا ممكن نصلي ونرجع نكمل لأن صلاة العشاء لو دخلت حنكون ضيعنا صلاة المغرب "

فللأسف سابني ومشى فابتسمت ابسامة تعجب

- " أستاذ أهم حاجة تطلعني أصلي قبل ما وقت العشاء ييجي "

ولللأسف وأنا بصلي المغرب العشاء أذن عليا... ولما رجعت كان شرح درس بس كان سهل الحمد لله .... ما علييييييييينا

اليوم الساااااااااااادس ..... الأستاذ كان عنده عزاء فوصل الدرس متأخر ... فبيشرح المغرب أذن .. أوك عادي ... خلص مجموعة دروس ولسة بيدخل في الدرس الخامس

- " أستاذي ... الساعة 6:30 " فبص بصة غريبة جدددددددا

* " ماشي يا بابا معلش " وطبعا صوت الضحك بنات وبنين

- " أنا أقصد المغرب حتفوت فاضل نصف ساعة على العشاء " نظر نظرة أغرب من الأولى

* " واللللللله ؟؟؟؟ طيب ماشي يا حبيبي "

طبعا بلهجة تقليس .... فمردتش عليه بصراحة ..... ححححححح ..... والدرس كله أولاد وبنات بيضحكوا ... طبعا مش كلهم كان في ناس تعي الموضوع رغم انهم مش بيصلوا ... المهم أنا كنت فعلا مش عارف أعمل إيه أول مرة أتعرض لموقف بالغرابة دي ... أنا فعلا كنت في صدمة

طبعا مش عارف أركز ... أنا عايز أصلي .... وعمال أكلم نفسي ... طب حضرتك بتصلي إزاي تقول كدة ؟؟؟ .... اللي مش بيصلوا عندهم حق على كدة لما يقلسوا على حد ويقولوله يا عم الشيخ ..... طب إيه الحل أطلع أصلي على طول ويولع هو ؟؟؟؟

وأنا مستغرق في التفكير الأستاذ قال يلا انتبهوا عشان نخلص الدرس ده بسرعة ونقيم صلاتنا وقالي خلاص ؟؟ طبعا مبصتلهوش ولا رديت عليه مش عارف كنت منفوخ منه ؟؟؟ مشفق عليه ؟؟؟ مصدوم من اللي قاله ؟؟؟ مش عارف

المهم وهو بيشرح ... العشاء أذن فأنا عملت تصرف فعلا لا إرادي وحطيت إيدي على وشي ومعرفتش أركز خاااااالص ... فعلا كنت مدايق جددددددا .... أول مرة تضيع مني صلاة كدة أدام عيني فاهمين الاحسااااااس ؟؟؟ ... المهم خلص شرح وقالي روح صلي ... وأنا طالع بيحط إيده على كتفي فبعدت عن إيده ورحت أصلي .... وهكذا انتهى آخر يوم في النحو والحمد لله لعله خير بس طبعا اتعلمت إني وقت الصلاة لو أي حد منعني يولع بقى المهم أصلي ... أصل مش حينفع يوم القيامة أقف أدام ربنا أقوله فلان قالي لا ... عيب أوي يعني

أنا بقى عايز أقول حاجة لكل مسلم

في ناس كتير جدا جدا معتقدة إن الواحد لو كان بيعمل أي حاجة غلط كشرب السجاير والأشياء الانحرافية مينفعش أصلا يصلي ..... وفعلا أنا قابلت ناس كتير جدا جدا كدة .. يا جماعة ده مدخل للشيطان ... الصلاة هي الفرق مبين المسلم وغير المسلم المفروض نفتخر إننا بنصلي وبنسجد لله عز وجل .... والنبي عليه الصلاة والسلام قال بنفسه : " كل ابن آدم خطاء وخير الخطائين التوابون "

إيه بقى المانع ان انت تصلي ؟؟؟

بقت الصلاة للمتدينين بس ؟؟؟؟

والباقي مينفعوش يصلوا ؟؟

يعني ربنا مش حيتقبل الصلاة ؟؟؟

مش عارف هما بيفكروا إزاي بس كل اللي في إيدي إني أعمل ثلاث حاجات

- أقول الحمد لله الذي عافاني

- أدعي ربنا يهدي المسلمين جميعا

- أنصح الأقربين مني وأصدقائي

معلش يا جماعة الموضوع طويل جدا بس أنا بكتب اللي في نفسي أعمل إيه منفوووووخ ... وشكرا على صبركم وقراءتكم للموضوع .... ياريت تشرفوني بردودكم الحلوة

سلام عليكم ورحمة الله وبركاته