عارفين !! ... إحساس تحححححفة والله

بسم الله الرحمن الرحيم

سلام عليكم

شباب عاملين إيه ؟ ... وحشني التدوين أوي والقراء والتعليقات والمدونات اللي متعود أقرأها على طول

إعذروني شغل بقى

طبعا حعد فترة كدة كل تدويناتي حتبقى على الفترة اللي فاتت

لأن الفترة اللي فاتت كانت فترة فعلا عجيبة

مليانة مواقف ... جميلة ... صعبة ... متعبة

ناس تقدرك ... وناس تدوس على كرامتك دوس ... وللأسف من أحب الناس ليا

أطفال تضحكلك تنسيك كل حاجة

شغل صعب جدا وخبرة تستحق

إحساس بمسؤلية

إمتحانات صعبة جدا ... ومذاكرة لأول مرة

كورسات

حياة كاملة بتتغير بسرعة كبيرة

قرارات كتير بتتاخد

قلب بيتهان

سبحان الله

ما علينا بقى

أنا النهاردة جي أحكي على رحلة

هي رحلة للأطفال

في اسكندرية

بتبدأ بمكتبة اسكندرية وبعدين قلعة قايتباي الأحياء المائية المتحف الروماني وفي الآخر النزهة .. كورة بقى ومسابقات وبعد كدة يلا يالا انت وهو كل واحد على بيته مش عايز أشوف حد هنا

طبعا أنا طلعت الرحلات دي وأنا صغير

وعارف إني زي ما بروح زي ما باجي للأسف

فضلت أفكر يوميها بالليل

عايز أخلي الرحلة مفيهاش روتين

عايز أموت العيال لعب بس لازم يطلعوا مستفيدين بحاجة

على الأقل المجموعة اللي معايا

الحمد لله ربنا ألهمني بفكرة ما

أخدت ورق من البرينتر

وأعدت أدور على الأقلام بتاع نص ساعة

الحمد لله لقيت قلم واحد

( أصل الأقلام بتخلص من عندنا بسرعة عشان المذاكرة تاك تاك تاك مفيش رحمة )

ههههههههههههه

المهم

رحت وأول ما وصلنا لأول مكان

جمعت المجموعة اللي الجمعية مكلفاني بمصاحبتها :D

وقولتلهم بصوا كل واحد ياخد ورقة وأنا معايا قلم اللي يحتاجه يقولي

وأحسن حيكتبلي اتعلم إيه من الرحلة ليه خمسة جني القهراوية بيقولوها ( جنيه )

ما علينا

وقولتلهم مش عايزكم تكتبولي التاريخ

أنا عايز حسيتوا بإيه ... حاجة علقت في دماغك .. موقف ملهوش دعوة بالرحلة .. حاجة عجبتكم كدة يعني والجايزة مش لأكتر واحد يكتب الجايزة للي يكتب بصدق وبفهم وبإحساس

ونظرات الحماس ملت عيونهم

تحفة أوي الإحساس ده

لالا بصوا دي

واحد سمعنا قالي أستاذ ممكن أدخل في المسابقة دي

قولتلوا طبعا اتفضل ورقة ووريني نفسك

قالي أنا حاخد الخمسة جني

عشان مطولش عليكم

هو فعلا أخد الخمسة جني

اسمحولي أجيبلكم مقتبسات من اللي كتبه

وعندما رأيت الآثار جميعها ناوبني شعور الاستفهام كيف مضت جميع هذه القرون ومازالت الآثار محتفظة بجمالها وألوانها فعرفت أن الإجابة هي إجابة واحدة وليس لها ثاني وهي " الاجتهاد في العمل "

وعندما قالت المرشدة أن هذه الآثار مستخرجة من الماء ناوبني ثانية شعور الاستفهام كيف استخرجت ؟! وعلمت بعدها أنه لولا العلم والمذاكرة لما توصل الإنسان والبشر إلى الكاميرا التي تصور في الماء والآلات التي تحمل الآثار من الماء إلى البر فنتعلم من هذا أن المذاكرة من أهم الأشياء

بصوا .. دي أجمد بقى

وعندما دخلت أصلي فوجئت وذهلت بمنظر لم أشد له مثيل من قبل فإذا به مطر شديد الغزارة وفي نفس الوقت شمس شديدة السطوع فعلمت ساعتها أنا الله يقدر على كل شيء فتيخل أنه بنفس القوة والقدرة خلق الجنة بجمالها وبنفس القوة أيضا خلق النار بشقائها فقرر أنت بنفسك ماذا تريد طبعا تريد الجنة فيجب أن تتعبد وتطيع بصدق لكي تصل إليها

على فكرة هو كاتب صفحتين ونص

بسم الله ما شاء الله

طيعا مش هو بس اللي كتب في واحد كمان كتب بس الورق اتبل منه ورماه لأن الدنيا شتت علينا

وواحد تاني كتب معايا ورقة بس مكسل أكتبها كتب بتاع سطرين كدة

شايفين الكسل

ههههههههههههه

بجد إحساس تحفة

وطول الرحلة شايفهم بيتأملوا

وبيحاولوا مياخدوش المواقف بالطريقة النمطية عشان ينافسوا بعض

طب عارفين في واحد فرحت بيه أوي أوي

جه قالي أستاذ أنا مستفدتش حاجة كلها حاجات فراعنة وناس مش بتعبد ربنا

حبة أحاسيس كدة تحفة أوي

حماس الولاد

منافسة

واحد يكتب بس ميقدرش يكمل

واحد الورقة تتقطع منه بس ميبقاش زعلان ويكمل الرحلة ومبسوط

وواحد صريح أوي

طبعا أنا محترم جدا جدا جدا ان في أطفال فيهم معندهمش مهارة الكتابة أو التعبير عن المشاعر زي ما هما عايزين

ودي حاجة أنا احترمتها

ويكفيني أوي أوي

إن في واحد فيهم على الأقل حس انه عنده موهبة التعبير عن شعوره بلباقة

وأنا بنصح حبيبي طبعا لو قرأ التدوينة دي انه يعمل كراسة وعلى الأقل كل يوم يكتب ولو موقف واحد

حينمي موهبته

حيحيي العبادة اللي معظم الناس ناسياها وهي التأمل

وحاجات كتير على مستواه الشخصي وفكره حيعلا

وفي آخر التدوينة طبعا عايز أوصيكم بشيء مهم

لو حد عنده إخوات صغيرين أو ربنا رزقه بأطفال في البيت

يتناقش معاهم في كل حاجة ويستوعبهم وميغضبش لما يعملوا حاجة غلط ويعودهم على الصراحة عشان لما يكبروا ميكدبوش

واوعوا حد يمد إيده على طفل عشان أنا بموت في حاجة اسمها أطفال

والطفل اللي يتصل بيا يقولي أخويا ضربني ولا حاجة

مبقاش عبادة لو معملتش كذا كذا

يلا يا جماعة

سلام عليكم