هي السجاير بقت عادية وأنا مش واخد بالي ؟؟

بسم الله الرحمن الرحيم

أنا فعلا مندهش الناس كلها بتشرب سجاير .... طبعا مش كل الناس ... بس تمشي في الشاريع فعلا تحس ان كل الناس بتشرب سجاير ... طيب مش اشكال دي ناس كبيرة وممكن نقول صعب يبطلوها طب الصغيرين ؟؟؟؟؟؟؟ بيشربوها أدام الناس وعادي جدا ولا كأن دي صحتهم خالص والغريب ان هما عارفين انها مضرة

أصل النهاردة حصل موقف غريب وهو ده اللي خلاني أثير هذا الموضوع

كنت راجع من درس معزز مكرم آعد في الترام وأدامي واحد كبير ... وفي الكراسي اللي جمبنا تلاتة عندهم حوالي تسعتاشر سنة وبيشربوا سجاير ... طبعا في الترام مكتوب ( ممنوع التدخين لعدم التعرض للمساءلة القانونية ) بس طبعا دول ولا في الدماغ

المهم الراجل اللي جمبي قالهم اطفوا السجاير عشان ممنوع وعشان صحتي ... ردوا عليه بكل بجاحة ...... لا مش ممنوع نادي الكمسري لو عايز محدش ليه حاجة عندنا ... ( طبعا بصوت ضخم لا يطاق وبعوجة الفم تحس انهم مش بشر )

المهم نادى الراجل على الكمسري ...... ففوجئت بأغرب حاجة في حياتي ....الكمسري اتنرفز وقال أنا كرهت الشغلانة دي والله قالها بصوت عالي وقال أنا ساعات ببص في المرايا بحتقر نفسي اني شغال كمسري بسبب اللي بيحصل معايا

طبعا الناس فوجئت من هذا التصرف المفاجئ...

المهم كمل الكمسري كلامه وبيحكي بحرقة وبيقول .... أنا اتفتح عليا مطاوي في الترام واتهزأت بسبب إني بقول للركاب ممنوع التدخين في الترام والناس بنت الـ ( حذفت للرقابة ) تشتكي من السجاير ويكونوا أول ناس يمشوا ويتخلوا عني لما حد يشد معايا ... ده مرة بقول لواحد اطفي سجارتك قالي أطفيها في عينك وكان حيحطها في عيني أدام الناس وأنا أكبر منه ولما ضربته بالألم الناس اللي كانت بتشتكي مسكتني وقالولي حرام عليك ... ده أنا بتهزأ بسبب الشغلانة دي ... أنا بحتقر نفسي لما ببص في المرايا وببقى عايز أتف على المرايا

أنا طبعا لما سمعت الكلام ده زوهلت وقولت الحمد لله أنا بجد في نعم كتير .... ربنا يهدينا جميعا

أنا طبعا مش عارف أقول ... أنا سايبلكم انتم التعليق لأن أنا فعلا مستاء من الموضوع ده ... سلام عليكم ورحمة الله وبركاته